პროექტი მზისკარი
პროგრამის მიზანი:
პროექტის მიზანია ხელი შეუწყოს ახალი, ნიშური შეთავაზების განვითარებას გასტროტურიზმის მიმართულებით და ქვეყნის მასშტაბით გააერთიანოს ისეთი მასპინძელი ოჯახები, რომლებიც სტუმრებს, რეგიონისთვის დამახასიათებელი კერძების გარდა, სთავაზობენ ავთენტურ, ოჯახურ გარემოში, ადგილობრივი სტუმართ-მასპინძლობის ტრადიციების გაცნობას; კერძის მომზადების პროცესში მონაწილეობასა და გასტრონომიულ ინტერპრეტაციას.
პროგრამის მოკლე აღწერა:
„მზისკარის“ ქსელში გაერთიანებულ მასპინძელ ოჯახებს, ტურიზმის ადმინისტრაცია მთელ რიგ ხელშემწყობ აქტივობებს სთავაზობს:
მომსახურების ხარისხის გაუმჯობესების მიზნით ინდივიდუალური ტრენინგები და კონსულტაციები:
- სურსათის უვნებლობა;
- ინტერიერისა და ექსტერიერის დიზაინი;
- კერძების შექმნა/გამრავალფეროვნება, მენიუს შემუშავება და კონკურენტუნარიანი შეთავაზების ფორმირება.
მხარდაჭერა მარკეტინგში:
- პროექტის ვებ გვერდსა (mziskari.ge) და სოციალურ ქსელებში – ფეისბუქ და ინსტაგრამ გვერდებზე განთავსება – პერსონალური პროფილებით (ობიექტის აღწერილობა/ფოტო კოლაჟი/ ვიდეო წარდგენა)
- საერთაშორისო და შიდა ბაზარზე პოპულარიზაცია
- სასაჩუქრე პაკეტის შექმნა (მენიუს დიზაინი, ინვენტარი)
მისაწვდომობის გაუმჯობესება
- ბრენდირებული მაიდენტიფიცირებელი ნიშნის დამზადება/მონტაჟი
ფინანსებზე წვდომა
- აწარმოე საქართველოში – „მიკრო მეწარმეობის მხარდაჭერის“ სახელმწიფო პროგრამა
სპეციალურად „მზისკარის“ წევრისთვის: სესხის დარიცხული საპროცენტო განაკვეთის სრულად სუბსიდირება. ხოლო სრულად ათვისებული სესხის შემთხვევაში 25% ქეშბექი.
პროგრამის სამიზნე ჯგუფი და გეოგრაფიული არეალი:
- მუდმივად მაცხოვრებელი ოჯახები რომელიც ეწევა რეგიონისთვის სახასიათო კვებითი მომსახურების შეთავაზებას
- პროგრამა ხორციელდება ქვეყნის მასშტაბით გარდა შემდეგი დიდი ქალაქებისა: თბილისი, ბათუმი, ქუთაისი, თელავი, ზუგდიდი, რუსთავი.
პროგრამაში მონაწილეობის კრიტერიუმები:
სავალდებულო კრიტერიუმები:
1. საოჯახო ტიპის კვების მასპინძელი (შემდგომში - „ობიექტი“) სტუმრებს სთავაზობს რეგიონისთვის/ქვეყნისთვის დამახასიათებელ ტრადიციულ გასტრონომიულ გამოცდილებას.
1.1. იმისათვის, რომ საოჯახო ტიპის მასპინძლად მიჩნეულ იქნას ობიექტი, იგი სავალდებულოა აკმაყოფილებდეს შემდეგ კრიტერიუმებს:
1.1.1. ოჯახი (ობიექტის მესაკუთრე) მუდმივად ცხოვრობს ადგილზე;
1.1.2. სამასპინძლო ინფრასტრუქტურა განლაგებულია იმავე ტერიტორიაზე, სადაც ოჯახი ცხოვრობს ან/და მიმდებარე ნაკვეთზე ან/და იმავე სოფელში არსებულ ტრადიციულ ეზოში/კარ-მიდამოზე.
1.1.3. ობიექტი იმართება ოჯახის წევრების ჩართულობით, ამასთან, შესაძლებელია, რომ ხორციელდებოდეს დამატებითი პერსონალის დაქირავებაც.
2. მასპინძელი (ობიექტი) რეგისტრირებულია ეკონომიკურ საქმიანობათა რეესტრში.
3. ობიექტს შეუძლია ერთდროულად მინიმუმ-6 და მაქსიმუმ-45 სტუმრის გამასპინძლება დახურულ ან/და გადახურულ სივრცეში.
4. ობიექტი უწყვეტად ოპერირებს წლის განმავლობაში მინიმუმ 9 თვე, გარდა თუშეთისა და ხევსურეთისა, აღნიშნულ რეგიონებში კი, სავალდებულოა მინიმუმ 4 თვიანი სამუშაო სეზონი.
5. ადგილზე (ობიექტზე) ხორციელდება სურსათის/კერძების-სასმლის მომზადება.
6. ობიექტს გააჩნია სტუმრებისთვის გასამასპინძლებელი კერძების მოსამზადებლად ცალკე სამზარეულო.
7. ობიექტი ფუნქციონირებს შესაბამისი ჰიგიენური ნორმების დაცვით (ობიექტზე ვრცელდება მხოლოდ „ტექნიკური რეგლამენტების − „სურსათის ჰიგიენის ზოგადი წესისა“ და „სურსათის ჰიგიენის გამარტივებული წესის“ დამტკიცების თაობაზე საქართველოს მთავრობის 2010 წლის 25 ივნისის N173 დადგენილება (სურსათის ჰიგიენის ზოგადი წესი)).
8. ობიექტის მფლობელს საკუთრებაში გააჩნია მიწა/მცირე მეურნეობა, სადაც ხორციელდება რეგიონისთვის/ქვეყნისთვის დამახასიათებელ აგროკულტურული საქმიანობები (გარდა მევენახეობისა) (მინიმუმ მცირე ზომის ფერმერული მეურნეობა, სოფლის მეურნეობის პროდუქტების მოყვანა, ა.შ.) ან/და სადემონსტრაციო/სანიმუშო/საინტერპრეტაციო მეურნეობის მოდელი.
9. ობიექტს სავალდებულოა, რომ გააჩნდეს:
9.1. სტუმრის მისაღებად მოწესრიგებული, გამართული ინფრასტრუქტურა ტრადიციული ელემენტებით;
9.2. მოწესრიგებული ეზო/კარ-მიდამო;
9.3. გამართული ჰიგიენურ-სანიტარიული კვანძები (ობიექტს სავალდებულოა გააჩნდეს სტუმრებისთვის მოწყობილი ცალკე იზოლირებული სველი წერტილი (სტუმრების მიერ არ უნდა ხდებოდეს ოჯახის საექსპლუატაციო სველი წერტილით სარგებლობა)).
10. ობიექტი აღჭურვილია შესაბამისი საწარმოო და სამასპინძლო ჭურჭლეულით (ასევე შეძლებისდაგვარად წარმოდგენილია ტრადიციული ხის, თიხის, მეტალი, ქვის და აშ. ჭურჭელი).
11. ობიექტის მენიუ:
- ხელმისაწვდომია ქართულად და ინგლისურად;
- შედგენილია ტრადიციული ადგილობრივი კერძების ინგრედიენტების განმარტებებით (პროდუქტის GI - არსებობის შემთხვევაში ინგრედიენტის შესაბამისი განმარტებით);ფიქსირებული მენიუს შემთხვევაში, იგი სავალდებულოა შედგებოდეს ტრადიციული მინიმუმ 3 კომპონენტისგან (სტარტერი, მთავარი კერძი, დესერტი).
- მენიუში შეთავაზებული არ უნდა იყოს უცხო ქვეყნის კერძები.
12. ობიექტი მიკვლევადია ინტერნეტ სივრცეში:
- შესაძლებელია ინტერნეტ პლატფორმით დაჯავშნა
- სატელეფონო კავშირით დაჯავშნა
- ინტერნეტ პლატფორმაზე შესაძლებელია ობიექტში მიღებული შთაბეჭდილების გაზიარება
- ობიექტზე შესაძლებელია როგორც ნაღდი ანგარიშსწორება, ასევე ტერმინალით სარგებლობა/საბანკო ბარათით გადახდა.
არასავალდებულო (უპირატესობის მიმნიჭებელი):
1. ობიექტის ტერიტორიაზე მოწყობილია სივრცე რეგიონისთვის/ქვეყნისთვის დამახასიათებელი გასტროკულტურის ინტერპრეტაციის მიზნით და შეთავაზებულია აღნიშნულთან დაკავშირებული მასტერკლასები.
2. ობიექტს გააჩნია გასაყიდად დაფასოებული გასტრო პროდუქტები და ტრადიციული წარმოების სუვენირები (მაგ.: თაფლი, ყველი, ჩირი და სხვა., შესაბამისი განმარტებითი ეტიკეტებით, ან ტრადიციული ჭურჭლეული - მაგ.: ქვასანაყი, ციცხვი, ჩოგანი და სხვა.).
3. მასპინძელი შემოსილია შესაბამისი სამოსით (მაგ.: თავსაბურავი, წინსაფარი და ა.შ.).
პროგრამის ფარგლებში წარმოსადგენი დოკუმენტაცია:
- განაცხადი
- ამონაწერი მეწარმეთა რეესტრიდან
- ამონაწერი საჯარო რეესტრიდან, რაც ადასტურებს, რომ ობიექტის საკუთრებაში ან/და სარგებლობაში გააჩნია ის მიწის ნაკვეთი, რომელზეც განთავსებულია ობიექტი
- კრიტერიუმებთან ობიექტფსასის შესაბამისობის დამადასტურებელი დოკუმენტაცია
- ობიექტის ფოტომასალა
პროგრამის განხორციელების ვადები:
მიმდინარე
მიმაგრებული ფაილები:
