Growthhub

სოფლად მეწარმეობის განვითარების ხელშეწყობა

პროგრამის მიზანი:

ღონისძიების „სოფლად მეწარმეობის განვითარების ხელშეწყობა“ მიზანია სოფლად მოქმედი და პოტენციური მეწარმეებისთვის ფინანსურ რესურსებზე ხელმისაწვდომობის გაზრდა, რაც ხელს შეუწყობს სოფლის ეკონომიკურ განვითარებას.

ღონისძიების ძირითადი ამოცანებია:

სასოფლო - სამეურნეო პროდუქციის წარმოების განვითარების ხელშეწყობა;
სასოფლო - სამეურნეო გაერთიანებებისა და კოოპერაციების განვითარების ხელშეწყობა;
სოფლად ახალი საწარმოების შექმნის ხელშეწყობა;
სოფლად არსებული საწარმოების ტექნიკური გადაიარაღებისა და თანამედროვე საწარმოო საშუალებებით აღჭურვის ხელშეწყობა;
სოფლად ახალი სამუშაო ადგილების შექმნის ხელშეწყობა.

პროგრამის მოკლე აღწერა:

ღონისძიების ფარგლებში წარმოდგენილი პროექტების თანადაფინანსების ოდენობა განისაზღვრება არანაკლებ 25,000 (ოცდახუთი ათასი) ლარისა და არაუმეტეს 300,000 (სამასი ათასი) ლარისა.

ამასთან, სამინისტროს მიერ გასაწევი თანადაფინანსება არ უნდა აღემატებოდეს პროექტის საერთო ღირებულების 70%-ს, გარდა ახალგაზრდა მეწარმის კომპონენტისა, რომლის ფარგლებში თანადაფინანსების მაქსიმალური ოდენობა არ უნდა აღემატებოდეს პროექტის ღირებულების 90%-ს.

აღნიშნული თანადაფინანსების თანხა კომპონენტების მიხედვით ნაწილდება შემდეგნაირად, კერძოდ:

ახალგაზრდა მეწარმე - ითვალისწინებს ახალგაზრდა მეწარმის მიერ საწარმოს შექმნას და/ან აღჭურვას, ფიზიკური პირის ან იურიდიული პირის სახით, რომლის დამფუძნებელი ან თანადამფუძნებელი არის ახალგაზრდა. აღნიშნული კომპონენტის ფარგლებში თანადაფინანსების ოდენობა შეადგენს არანაკლებ 25,000.0 ლარს და არაუმეტეს 30,000.0 ლარს;

გახდი აგრომეწარმე - ითვალისწინებს ახალი სასოფლო - სამეურნეო საწარმოს შექმნას. აღნიშნული კომპონენტის ფარგლებში თანადაფინანსების ოდენობა შეადგენს არანაკლებ 40,000.0 ლარს და არაუმეტეს 100,000.0 ლარს;

აგროსაწარმოს გადაიარაღება / გაფართოება - ითვალისწინებს მოქმედი აგროსაწარმოს აღჭურვასა და/ან გაფართოებას. აღნიშნული კომპონენტის ფარგლებში თანადაფინანსების ოდენობა შეადგენს არანაკლებ 50,000.0 ლარს და არაუმეტეს 100,000.0 ლარს;

აგროინვესტიცია - ითვალისწინებს აჭარის ავტონომიური რესპუბლიკის ადმინისტრაციულ საზღვრებში საინვესტიციო პროექტის განხორციელებას, რომელიც მოიცავს როგორც მოქმედი საწარმოს აღჭურვასა და ტექნიკურ გადაიარაღებას, ასევე ახალი საწარმოს მოწყობასა და აღჭურვას. აღნიშნული კომპონენტის ფარგლებში თანადაფინანსების ოდენობა შეადგენს არანაკლებ 100,000.0 (ასი ათასი) ლარს და არაუმეტეს 300,000.0 (სამასი ათასი) ლარს.

პროგრამის სამიზნე ჯგუფი და გეოგრაფიული არეალი:

პროგრამა ხორციელდება აჭარის რეგიონის მასშტაბით (გარდა ქალაქ ბათუმის ადმინისტრაციულ საზღვრებში არსებული ე.წ. სამრეწველო ზონ(ები)სა და ქალაქ ქობულეთის ტერიტორიისა)

პროგრამაში მონაწილეობის კრიტერიუმები:

ტექნიკური გამართულობა და ამ წესის მოთხოვნებისადმი შესაბამისობა;
პრიორიტეტულ მიმართულებებთან შესაბამისობა;
იდეის დასაბუთება;
ფინანსური დასაბუთება;
პროექტის მდგრადობა;
გამართული სამოქმედო გეგმა;
ადგილობრივი ნედლეულის გადამუშავება და ადგილობრივი შრომითი რესურსების გამოყენება;
შესაძლო რისკების ანალიზი და მართვის ღონისძიებები;
ინოვაციურობა;
პროექტის განხორციელებისთვის საჭირო საკუთრებაში და/ან სარგებლობაში არსებული ქონება;
კომპეტენცია და გამოცდილება;
ენერგოეფექტური და განახლებადი ენერგიის მიმართულებები;
ბიომეურნეობა (ორგანული, ეკოლოგიური) სასოფლო - სამეურნეო პროდუქციის წარმოება, გადამუშავება და რეალიზაცია.

პროგრამის ფარგლებში წარმოსადგენი დოკუმენტაცია:

განაცხადი;
უფლებამოსილი პირის პირადობის დამადასტურებელი დოკუმენტის ასლ(ებ)ი, წარმომადგენლის შემთხვევაში, ასევე წარმომადგენლობაზე უფლებამოსილების დამადასტურებელი დოკუმენტი;
პროექტის განხორციელების ადგილის უძრავი ქონების საკუთრების / იჯარის / აღნაგობის დამადასტურებელი დოკუმენტი (ამონაწერი საჯარო რეესტრიდან);
შესასყიდი საქონლის / მომსახურების ინვოის(ებ)ი ან/ და ხელშეკრულება;
განახლებული ამონაწერი მეწარმეთა და არასამეწარმეო (არაკომერციული) იურიდიულ პირთა რეესტრიდან (თანადაფინანსების ხელშეკრულების გაფორმების ეტაპზე);
ცნობა და/ან შედარების აქტი სსიპ შემოსავლების სამსახურიდან საგადასახადო დავალიანების არქონის შესახებ (თანადაფინანსების ხელშეკრულების გაფორმების ეტაპზე);
საბანკო რეკვიზიტები (თანადაფინანსების ხელშეკრულების გაფორმების ეტაპზე);
სასოფლო - სამეურნეო კოოპერატივების შემთხვევაში - წესდება / კრების ოქმი;
შშმ პირის შემთხვევაში - სოციალური მომსახურების სააგენტოს მიერ გაცემული ცნობა ან შშმ პირის სტატუსის დამადასტურებელი სპეციალური მოწმობა (თუ განმცხადებელი ფიზიკური ან იურიდიული პირის ერთ-ერთი დამფუძნებელი არის შშმ პირი);
ცალკეული განაცხადის სპეციფიკიდან გამომდინარე, შესაძლებელია სამინისტროს მიერ მოხდეს დამატებითი დოკუმენტაციის მოთხოვნა. დოკუმენტაციის წარმოდგენა შესაძლებელია განხორციელდეს განაცხადის დამუშავების სხვადასხვა ეტაპზეც.